ҚР Жеңіл атлетика федерациясының жаңа президенті сайланды ҚР Жеңіл атлетика федерациясының жаңа президенті сайланды
356

ҚР Жеңіл атлетика федерациясының жаңа президенті сайланды

Бүгін Астанада Қазақстан Республикасы Жеңіл атлетика федерациясының Кезектен тыс конференциясы өті. Жиын барысында Федерацияның жаңа президенті болып Ахметов Даниал Кенжетайұлы сайланды, – деп хабарлайды ҚР Жеңіл атлетика федерациясының баспасөз қызметі.

Елордамыздың «Hilton» қонақүйінде өткен Кезектен тыс конференцияның күн тәртібінде екі мәселе қарастырылды:

  1. ҚР Жеңіл атлетика федерациясын бұған дейін басқарған Жақсыбеков Әділбек Рыскелдіұлының өкілеттілігін мерзімінен бұрын тоқтату;
  2. ҚР Жеңіл атлетика федерациясының жаңа президентін сайлау.

Осылайша, Атқару комитеті мүшелерінің бірауызды шешімімен Әділбек Жақсыбековтың өкілеттілігі мерзімінен бұрын тоқтатылып, оның орнына ҚР Жеңіл атлетика федерациясының президенті болып Ахметов Даниал Кенжетайұлы сайланды.

– Маған сенім білдіргендеріңізге рахмет! Әділбек Рыскелдұлы басқарған бір жылдың ішінде аз шаруа атқарылған жоқ. Енді сол бастамаларды ары қарай жалғастырып, Қазақстан жеңіл атлетика федерациясын дамытуға тырысамыз. Алдымызға қойған мақсаттарымыз өте көп. Мәселен, бірінші ретте спорттық инфрақұрылымдарды жетілдіруді көздейміз. Жақын уақытта жеңіл атлетикаға бейімі бар барлық өңірлердің әкімдерімен кездесіп, сол аймақтардың жеңіл атлетика спортын дамыту жолдарын қарастырамыз. Соның ішінде, келесі жылы Семей қаласында Ұлттық құрамалар базасы дайын болады, - деді Даниал Кенжетайұлы.   

Сондай-ақ, Кезектен тыс конференцияда ҚР Жеңіл атлетика федерациясы Атқару комитетінің жаңа мүшелері бекітіліп, Әділбек Жақсыбеков Атқару комитетінің құрамына енді.

Ахметов Даниал Кенжетайұлы

1954 жылы 15 маусымда Павлодар қаласында дүниеге келген.

1976 жылы Павлодар индустриалды институтын бітірген. Мамандығы бойынша инженер-құрылысшы.

Экономика ғылымдарының докторы, Қазақстан Республикасы Минералды ресурстар академиясының академигі. 

Еңбек жолы:

1976-1981 жж. - «Павлодар тұрғынқұрылыс» тресінде мастер;

1981–1983 жж. - Екібастұз қалалық партия комитетінде нұсқаушы;

1983–1987 жж. - «Екібастұзшахтақұрылыс» комбинатында бас инженердің орынбасары, партком хатшысы;

1987–1991 жж. - Екібастұз қалалық атқару комитеті төрағасының орынбасары;

1991-1992 жж. - «Екібастұз энерготұрғынөндірісқұрылыс» трестінің басқарушысы;

1992-1993 жж. - Екібастұз қалалық әкімшілігінің басшысы;

1993-1997 жж. – Павлодар облысының әкімі;

12.1997-10.1999 жж. - Солтүстік Қазақстан облысының әкімі;

10.1999-21.12.2000 жж.  –  Қазақстан Республикасы Премьер-министрінің орынбасары;

21.12.2000-21.11.2001 жж. - Қазақстан Республикасы Премьер-министрінің Бірінші орынбасары;

21.11.2001-13.06.2003 жж. - Павлодар облысының әкімі;

13.06.2003-08.01.2007 жж. - Қазақстан Республикасының Премьер-министрі;

10.01.2007-17.06.2009 жж. - Қазақстан Республикасының Қорғаныс министрi;

12.2010 жылдан – Экологиялық энергетика саласындағы кәсіпорын басшысы;

2012-11.2014 жж. – Энергетика және инфрақұрылым министрі;

2014 жылдың 11 қарашасында Шығыс Қазақстан облысының әкімі болып тағайындалды.

Марапаттары:

2-дәрежелі «Барыс» (2004), 3 дәрежелі «Барыс» (1999), «Құрмет белгісі» (1986); «Қазақстан Республикасының Тұңғыш Президенті - Елбасы Нұрсұлтан Назарбаев» (2012) ордені және «Астанаға 10 жыл» атты мерейтойлық медалдің (01.07.2008) иегері. 

 

Тізімге қайта оралу